Waa gabay baaq ah, oo ku socda madaxda dawladda Soomaaliyeed, oo ku saabsan xarigga loo gaystay Korneel Cismaan Cilmi Guurre “Korneel Cukaashe” oo in ka badan 3bil u xiran dawladda, ka dib, gabay uu ka tiriyey musuqa ka jira wasaaradda Gaashaandhigga. Gabayga Garnasi waxaa tirey;
Abwaan Cabdiraxiin H. Galayr ee bal nala daawada.
Sidoo kale, Hal abuurka Soomaaliyeed in iyaguna kaalintooda ka qaataan, sidii loogu doodi lahaa dhibbane Korneel Cukaashe, illaa uu dib xorriyaddiisa uga helayo.Gabaygan waa gabay aan ugu doodayo, anoon qareen ahayn Dhibbane; Cukaashe, oo ku xiran xabsiga Dhexe, ee Xamar
1. Gar baa lagu dhigtaa gabayga, Waa lagu garaabaaye
2. Godob adiga kaa maqan ayaa, Gabaygu keenaaye
3. Gefkaa lagu saxaa qalad gedmadey, Gabay hilaaddiise
4. Geedkaa la geeyaa murtida, Godolba xaalkeede
5. Waxa aad ka giigtee qalbigu, Gama’ hurdoon waayo
6. Ee Gulucda ku reeba baa, Lagu gorfeeyaaye.
7. Bal soo gudbiyo dulucda guud, waa Gedaan rabo e
8. Oo aan go’aammada ugu dego, Gar iyo xeeshayda
9. Garta hadafka Soomaaliyeey, Waa galbinayaaye
10. Garsoorka iyo Gaashaandhiggoow, Garo Ujeedkayga
11. Guddoonsha dalkoow maqal garbaan, Geedka soo dhigaye.
12. Taladii gedmani ma hurto abid, Guud caddaa gala’e
13. Gadhmadoobe odayaala iyo, Guurti loo xula’e
14. Godob li’i u ayaa lagu dhaqa, Gororka xaalkeeda
15. Go’aankana waxaa lagu ridaa, Kii gefkaa dhigay.
16. Aniguna geddii baan ahaye, Maqal guddoonkayga
17. Oo gogoldhig weeyee murtida, Gunud tilmaamteeda.
18. Geddigeed adduunyada heshiis, Guuda baa jira’e
19. Shaqaalaha mid gaaraa u yaal, Goob u joogaba’e
20. Gunno iyo mushahar bay helaan, Googo’ lacageede
21. Bil kastoo go’daba waa iney, Gaadho gacantoode
22. Iyagana xil gudashaa dultaal, Waajib geliddiise
23. Goolkay dhashaa laga helaa, Guul is garabtaal.
24. Waa go’aan dastuuriya waxay, Gocoto laabtaadu.
25. Xisbi adiga kuu gooniyiyo, Ururro guuleedka
26. Qof kastaba geddii inuu xoryahay, Lana guhaadeyne
27. Afartaa Garnayl aan ridiyo, Gumuc rasaaseed dheh
28. Gaydh soo dhacaysiyo dabayl, Guuxda weligeed dheh
29. Gariir danaba, guguciyo sanqadho, Galalacdii roob dheh
30. Gabaxlaha gu’goo hoorayoo, Guday habeenkii dheh.
31. Afar kale askari gayfaniyo, Guusha kii waday dheh
32. Bal aan galo wax gudi karaan, Galaba xaalkeede
33. Garaad waa ogyahay ruuxa lehi, Gocorse yeelkiiye
34. Inagoo gam’aynoo hurdada, Jiifna gurigeena
35. Iyagaa geyiga cadow ka jira, Guura bahalayne
36. Iyagaa gantaalaha dhaciyo, Gumaca boodaaya
37. Gaaddada u dhiga oo u go’a, Guriga hooyaade
38. Iyagaana geerida ka jecel, Nolosha Goobkeede
39. Gabadannada iyagoow hoyda, Gu’ iyo jiilaale
40. Gogol iyo sariir waxay bidaan, Ciidda guradeede
41. Gawaan waxay Jiifsadaan, Buura guradood
42. Geedaha ay weheshadaan, Goor iyo ayaane
43. Cidlaay gaaf wareegaan markaan, Jiifno gogosheene
44. Geyigiyo dhulkeennay jiraan, Cadow ka gaarshaane
45. Waa gaadh-hayaha noo dirane, Guudka noo jira’e.
46. Afartaa go’aankaan rabiyo, Gar iyo xaalkeed dheh
47. GOD DALOOLA noo muuqata, Gole ka sheegeed dheh
48. Geddii lagu yiqiin geeskayaga, Ga iyo waawgeed dheh
49. Farriin gaar ah, hadal guurtiyeed, Maanso gororkeed dheh.
50. Afar kale midhkay gubayayee, Ganaya jiidhkay dheh
51. Geesiga Cukaasha ah hadduu, Taabtay Godobtiina
52. Geeshkii dalkeenniyo askari, Gooba cadowgeenna
53. Galiilyadiyo ciilkay qabaan, Gabay ku faalleeyey
54. In la gebagebaayaa dadyahaw, Saw gef noqon mayso
55. Gaashaammadoo laga rifaa, Saw gef noqon mayso
56. Garbaduub in loo xidho dadyahaw, Saw gef noqon mayso
57. Gaalshire in loo diro dadyahaw, Saw gef noqon mayso
58. Xabsi iyo guhaad inuu arkaa, Saw gef noqon mayso
59. God mugdiga in hooy looga dhigo, Saw gef noqon mayso
60. Gardarriyo xumaan lagu falaa, Saw gef noqon mayso
61. Inaan gacan dambeedshaa, Dadyahaw saw gef noqon
mayso!
62. Mar haddii garaam aanu jirin, Guri hoyaadkiisa
63. Mar haddii geddii lagu ballamay, Aan la gudanaynin
64. Mar haddaan go’doon xaalku yahay, Saw gunnimo maaha
65. Mar haddaan gabaahiir la dhigay, Gocorna loo buuxshay
66. Mar haddii go’aankeennu yahay, Cadowga Guuleysta
67. Afrikada gabrani way helaan, Ginigii lacageede
68. Gaajo iyo diif lama tusiyo, Gocosho xaalkeede
69. GUULWADAHA Soomaaliyeed, Yaa la gaasiraye.
70. Afartaa askari geyfaniyo, Geeshka hadalkii dheh
71. Godobtii Cukaashiyo gabyaa, Gole ka sheeggii dheh
72. Gardarrada hoggaankiyo dhibkii, Gaadhay gacalkay dheh
73. Farriin gaar ah, hadal guurtiyeed, Maanso gororkeed dheh.
74. Afar kale guul ciidankeen, Gaadhay hadalkeed dheh
75. Askarigu wuxuu noo galiyo, Lama gudbaankeed dheh.
76. Galabtii Maxkamaddii galeen, Guuta bahalaydu
77. Gafuur duubtu ay galalafeen, Gumucu qiiqaayey
78. Iyagaa gudaha dalaq yidhoo, Laayey gebigoode
79. Iyagaana shacabkii ku guray, Guudka dhabarkoode
80. Afrikaanku waa tuu ka guday, Goobta dirireede
81. Waa teey gabbanayeen kolkii, Guuxu uu baxaye
82. Gawaarida waa tay gurteen, Gebi dhuunteene
83. Geesinnimada jayshkii lahaa, Guusha heliddeede
84. Garaaddiyo ammaan maysan helin, Guudka loo sudha’e
85. Garaamkoodii baa gaabis galay, Guunyo kale daaye.
86. Baarlamaanka galabtii la galay, Gudaha loo buuxay
87. Gaaddada ragboow dhigay dilkoo, Geeri doorbidaye
88. Gaadhiga darbuu jiidhayoo, Gaasas buu maraye
89. Xildhibaanku goortuu ka dhacay, Daaqadaha gaadhan
90. Ragbaa dhiiga goobtaa ku baxay, Daadshay gacaloowe
91. Godka loo Janneeyey dhaheen, Guud ahaan shacabe
92. Gaashaandhiggiyo baan ogeyn, Gole Wasiiraade
93. Guddoonshaha dalkeenannaan garan, Geeshka aad tahaye
94. Afrikada ayay garab bidaan, Magac la goobaane
95. Geesiga u dhimanaaya bay, Abid giriifaane
96. Waxaan uga gol leeyahay dadyahaw, Waad I garateene
97. Gabaygii Cukaashiyo midkaan, Caawa gole keenay
98. Waa dhaqan gobeedoo murtida, Lagu gorfeeyaaye
99. Waa xeerka Geeska Afrikiyo, Gebiba Soomaale
100. Waa godob ku reebkii afkiyo, Xaqa garsoorkiiye
101. Fadhigaaga ruux kaa gudbee, Goob xun kugu dhaafa
102. Goortaad istaagtana ma helo, Xaalka kuu gara’e.
103. Aan soo gunaanado murtida, Gaabsho hadalkayga
104. Guddoonshaha dalkoow maqal adaan, Kuu gol leeyahaye
105. Gaashaandhiggoow maqal adaan, Kuu gudbinayaaye
106. Garsoorkiyo dalkoow maqal xaq, Waa lama gefaankiiye
107. Golihii shacbigoow garo adaan, Kuu galiin ahaye
108. Godka waa in laga soo baxshaa, Geesigaa xidhane
109. Waa inuu garaaddiyo helaa, Xaal Gob loo huro’e
110. Waa inuu xornimo gaara iyo, Sharaf guddoontaaye
111. Waa inuu geddii lagu yiqiin, Gaadho meel sare
112. Haddii kale Geddii gocorradiyo, Waa guni weyne
113. Kacaankii gefaad noqonaysaan, Guutadii hore
114. Gafuurduub ayaad ehel tihiin, Guudka Qaaciddo
115. Garbaduud ayaad noo xidheen, Geed qudhaanjo leh
116. Garangoori baad noqoneysaan, Ganaysa jiidhkeene
117. Go’aankeennu waa laba midkaad, ee guddoonsada.
W/C: Cabdiraxiin Hilowle Galayr
