GABAY: Waxaa Loogu Talagalay Gabaygan Bulshoweynta Magaalada Caabudwaaq "Maamulkiina Taabaca".Curiye: Xasan Bulxan Cali.*Dhagayso*

GABAY: Waxaa Loogu Talagalay Gabaygan Bulshoweynta magaalada Caabudwaaq  “Maamulkiina Taabaca”.Curiye: Xasan Bulxan Cali.*Dhagayso*

1. In dhoweyd tiraabkii murtida teekalkaw jaraye
2. Tixahaan wixii igu ceshaan toosh ku shidayaaye
3. Todobaadkan hawshii dhacdoo taamka loo fuliyay
4. Taageeradeedaa farxadi ila taraartaaye
5. Tayo maamulaa lagu helaa taliyo tawfiiqe
6. Isku tiirsanaan wadajirbaa lagu tanaadaaye
7. Midigtuba ma taabteen waxqabad keli taloognaw e
8. Nabaddaa u toolmoon waxaad raadisaan tidice
9. Meeshii ammaan tuunsan yahay tiigsay aadmiguye
10. Talaxumadu waa goob colaad tuute loo xirane
11. Tabtaan jeer ahayn yaan mar kale taako loo noqone
12. Maamulkiina taabaca horumarkaad tiigsataad heliye
13. Kuwa jidadka tuuxaynayee baarasho u taagan
14. Nin masaafur boorsadi tuhmaa seegyay taladiiye
15. Tif-tif hoose yeeshoo kuwaas jeel halagu tuuro
16. Qolo-qolo tir-tira waxaa tihiin tawl walaala ahe
17. Abtirsiga waxaysugu tagtaan oday tafiirtiiye
18. Kuwo diin ku kala tagay ayay talo midaysaaye
19. Tar-tan weeye dunidani isfaham lays tammadiyaaye
20. Federaal ayaa lagu tashaday gobolba taagtiiye
21. Tiisii kalkaalaa qof kale taarta caawimo e
22. Mar haddii lagaa tago higsigu waa tab kuu furane
23. In tusaale wacan aatahaa taa ka khayr badane
24. Ehlusuno tubtay jeexday mara toobiyaa falane
25. Ammaankay taseeyeen la dhece kii wanaag tebiye
26. Idinkuna ku talagala waxqabad taa ka xoog badane
27. Dadyowgii qurbaha tagay kurtood tacabir weeyaane
28. Nin walbaa hantidi uu tabcuu tuumin gobolkiiye
29. Warshaday ku wada taamayaan teedka loo dhigo e
30. Qaarbaa kambaniyaal taweli taabbagelintoode
31. Qaarbaa tagaabiyo waxqabad laamiyaal tixiye
32. Taqaatiir aqoon badan ayaad weli tebeysaane
33. Iyaguna tubtay soo hayaan wayna tagayaane
34. Hay’ado tamuuxdaa ayaa tiigsan gobolkiine
35. Shaqaalahay tereerin ufurin tababar joogtaaye
36. Haddii aan degaankaa tognayn tookhu waa khalade
37. Itus oo itaabsii ayaa toosan ficilkiiye
38. Maah-maah tabtay tiri xigmada taawi fahamkaaga
39. Ama toos u muuqoo waxqabad muuji tabartaada
40. Ama tagoo hajoogine maqnaw tuducdu weeyaane
41. Afartaas tiraabtiyo naxwahaan tiriyay sheeggii dheh
42. Tusaaliyo wax sheeg aan tolkay tixo ku gaarsiin dheh
43. Toosid iyo baraarugid waxqabad dhab u tilmaankeed dheh
44. U tanaasul dano guud mid gaar uga taggeedii dheh
45. Afarkalana tahniyad aan duri dumarka toolmoon dheh
46. Tariig muuqda weeyaan habluhu tiir anjabahayne
47. Tabaalihii lasoo maray kuwii tiirshay wayaga e
48. Markii qaranku tiginada ruqsaday tooda lagu khayrye
49. Tumun miiska suuqay tagtoo koriye tawlkiiye
50. Haddaan hooyo taladaas uqumin tiiha loo dhimaye
51. Maantana tayeeyoo iyagaa taagay nabadaane
52. Xubintood ha tuurine ku dara maamul tiradiisa
53. Qalbi aan turxaan lagu ogayn daacadnimo taama
54. Naxariista aan abid tirmayn taajir bixintooda
55. Iyagaa tilmaan uleh naflaha tuuran idilkiiye
56. Tawfiiqda hoygeeda iyo waa tariig bixiye
57. Tabiiniyo dadaalbay bulshadi kula tacaaleene
58. Taariikhdaa sheegtoo warkood lagu tannaagooye
59. tabantaabi eebow kuwaas  tiirku wayaga e
60. Haddaan gabayga tu’iyoo murtida teekalka u dhaado
61. Tolweynaha waxaan kula ballami nabadda taageere
62. Horukaca tixgeliyoo xagsada lagu tanaad jeere
63. Talasaarta eeboo cabsidi ha idinku taagnaato
64. Haku tiiqsan khalad aad ogtahay tarid la’aantiise
65. Cafis ugu tiraab ruux ku yiri toobo xumahayga
66. Istaageera jacayl aan tirmayn laabtu hays toyato
67. Isu tura masaakiinta teba wax u taroo siiya
68. Ixtiraam tusoo waad ogtiin diintu say tiriye
69. Culimada taqsiir iyo afxumo hawla tagin jeerna
70. Tuska caabudwaaq balanballiyo taad dhabbad u aado
71. Bangeelloo tallaaba u jirtiyo buurta togeheeda
72. Gellinsoor tirada aan ku daro aricadays tiigso
73. Dalsan oo dhowaan timid degaan taransi weeyaane
74. Axmed gurayna taariikh faclaa lagu tilmaamaaye
75. Intaasoon tirshiyo qaar kaloo tirale weeyaane
76. Tawfiiq ammaanliyo allow toosi daneheenna
77. Ilaahow tigaad iyo nasii roob tayiyo khayrle
78. Tuhun kala shakiya waa xunyee ehelka noo toosi
79. Isku tiirsanaan wadajirbaan tuugnee nagu caawi
80. Maamulkana mid aad taqabashoo taam ah kaa barinay.
    
    
    
    

[ca_audio url=”http://allgalgaduud.com/wp-content/uploads/2013/03/Maamulkiina-Taabaca1.mp3″ width=”500″ height=”27″ css_class=”codeart-google-mp3-player” autoplay=”false”]

Curiye:- Xasan Bulxan Cali
Email:- bulxan105@hotmail.com

Isha Ku hay Allgalgaduud Media
allgalgaduud@gmail.com