Ciidanka xoogga dalka ayaa weerar qorshaysan ku qaaday Xubno katirsan Al-Shabaab oo ku sugnaa tuulada Baraagta reer Shadoor oo hoos tagta degmada Ceeldheer ee Gobolka Galgaduud.
Saraakiil katirsan Ciidamada xoogga dalka ayaa Warbaahinta u sheegay inay Ciidamadu gubeen Gaari Cabdi Bille ah, sidoo kale ay dileen Xubnihii katirsanaa Al-Shabaab.
Sidoo kale saraakiishu waxaa ay sheegeen in gaari uu saarnaa qoriga lidka diyaaradaha ay ciidanku howlgalka ku burburiyeen.
Taliska ciidanka xoogga dalka ayaa warbaahinta sidoo kale u sheegay in deegaankii uu howlgalkaasi ka dhacay ay caganta ku dhigeen, iyagoo kaashanaya dadka deegaanka.
