Bankiga dhexe ee dalka ayaa maanta shatiga siiyay shirkada Isgaarsiinta Hormuud oo bixisa adeega EVC oo ah adeeg lacagaha la’iskugu diro taleefoonada Gacanta
Munaasbad ay ka qeybgaleen Wasiiro ka mid ah Xukuumadda Federaalka Soomaaliya, Guddoomiyaha Banka dhexe ee dalka, mas’uuliyiin ka socotay shirkadda Isgaarsiinta Hormuud iyo marti sharaf ganacsato u badan ayaa xafladda lagu casuumay oo marki ugu horeeysay maanta lagu bixiyay shatiga lacagaha taleefanada la isugu diro ee Shirkada Hormuud.
Wasiirka Wasaaradda Maaliyada Xukuumadda Federaalka Soomaaliya Mudane Cabdiraxmaan Ducaalle Beyle oo furay munaasabadda ayaa sheegay inay ku faraxsanyahay dadaalka xoogga leh ee lagu habeeynayo nidaamka maaliyadda Soomaliya.
Wasiirka Qorsheynta iyo Horumarinta dhaqaalaha Jamaal Maxamed Xasan ayaa sheegay lacagaha Taleefanada ay qeyb weyn ka yihiin horumarka dhaqaalaha iyo isgaarsiinta Soomaaliya.
Guddoomiyaha Bangiga dhexe ee dalka Cabdiraxmaan Maxamed Cabdullaahi oo munaasabadda ka hadlay ayaa sheegay in bandhiga dhexe labadi sano ee ugu danbeeysay uu waday nadaamka habeenta maaliyadda dalka, isaga oo shati guddoonsiiyay shirkadda Hormuud oo ah leesinka ugu horeeyay ee la siiyo shirkad bixisa adeega lacagta la isugu diro.
Guddoomiyaha Shirkada Hormuud Axmed Maxamuud Yuusuf ayaa munaasabadda ugu sheekeeyay horumarka isgaarsiinta iyo muhiimada shatigan wuxuuna Bangiga dhexe ee dowladda uga mahad celiyay sameynta xeer nidaamiya lacaga taleefoonka lagu diro.