Wararka naga soo gaaraya ilo wareedyadeena ku sugan magaalada Cadaado ayaa waxa ay sheegayaan in Wasiiru dowlaha madaxtooyada dowladda federaalka Xil: Mahad Maxamed Salaad ayaa maanta ka degay magaalada Cadaado ee caasimadda ku meel gaarka ah ee maamul-goboleedka Galmudug.
Warkan ayaa intaasi waxa uu ku darayaa Wasiiru dowlaha ayaa waxaa garoonka ku soo dhoweeyay qaar ka mid bulshada degaanka waxaana loo gelbiyay guri uu ka ijaartay magaalada Cadaado oo ay horay u sii degenaayeen eheladiisa iyo tiimka u ololeynayay.
Mahad Maxamed Salaad ayaa sheegay in uu u taaganyahay u tartamidda xubin aqalka sare ee dowladda federaalka Soomaaliya ah (senator), maadaama lagu wodo in dhawaan la doorto xubnaha aqalka sare, waxaana la qorshaynayaa in uu xilkaa kula tartamo xildhibaanad Jawaahir Axmed Cilmi oo ayaduna shalay ka degtay garoonka Cadaado .
Wasiir Mahad ayaa waxaa la xasuustaa in uu ahaa mid ka mid ah shaqsiyaadka madaxwayne Xassan Shekh sida aadka ah ugu dhow ilaa uu ka noqdo wasiiru dowlaha madaxtooyada kaliyana waxaa xilkaa kaga horreeyay Faarax Cabdulqaadir oo ruuxiisu ka mid saaxiibada madaxtooyada.
Dhinaca kale Xildhibaanka ayaa horay waxa uu ugu jiray u diyaar garow ku aaddan u tartamista mar kale xubin baarlamaan waxaase uu ka tanaasulay kadib markii uu caqabado badan kala kulmay bulshada iyo odoyaasha dhaqanka jufooyinka beesha uu ka soo jeedo oo badankood aan u arkin ruux ku haboon in markale la doorto maadaama la soo tijaabiyay muddo 4 sano ah.
Isku soo wada duuboo Dadka mucaarada Mahad Maxamed Salaad ayaa ku dhaleeceeya in uu dagaal ku qaaday degaanka uu kasoo jeeda ee Guri-ceel iyo Dhuusamareeb si xunna ula dhaqmay bulshada degaankaas kana gaystay dhibaatooyin uu ilaa iyo hadda raadkoodu muuqdo.