Ciidamada Nabad Sugidda Soomaaliya ayaa Goor dhaw inta u dhexeeysa Taalooyinka Daljirka-dahsoon iyo Xaawo-taako ku qabtay Gaari lagu soo xiray Waxyaabaha Qarxa.
Goobta lagu qabtay Gaariga ayaa waxaa ku yaalla Labo Maqaayadood oo Dadku ay ku badan yihiin,kuwaas oo kala ah Blu SKY iyo Al-Beyk.
Saraakiil ka tirsan Hay’adda NISA ayaa noo sheegay in Ciidanka ay heleen Xogta ah Qaraxa Gaariga lagu soo xiray islamarkaana halkaa la soo dhigay,waxaana Ciidamada ay Dadka ku Amreen in ay halkaa ka fagaadaan si aysan waxyeelo dadka uga soo gaarin,iyadoo Ciidanka NISA qeybta qaabilsan Miinooyinka ay ku guuleysteen in ay Qaraxyada gaariga lagu soo xiray ka furaan.
Sidoo kale Ciidanka ayaa wali baaritaan ku haya gaariga,iyagoo baaraya in gaariga uu yahay mid halkaa la soo dhigay oo la doonayay in Dadka lagu Waxyeeleeyo iyo inuu yahay Gaari Qaraxa lagu soo xiray oo la doonayay in lagu dhibaateeyo Qofkii Gaariga lahaa.
Wariye Cali Sheekhaaloow oo ka mid ah Wariyaasha KNN oo halkaa tagay ayaa sheegaya in Ciidamada ay Dadka Shacabka ah u diidayaan Goobta tagideeda islamarkaana ay wali baaris wadaan.
