Kismaayo(AGGM) Ciidamada Alshabaab oo maalmahan saldhigii ugu weynaa ka dhiganayey Magaalada Baardheere ee Gobolka Gedo ayaa maanta Magaalada duleedka uu ku dhexmarey Dagaal aad u qaraar kaasi oo sababay dhimasho iyo dhaawac soo kala gaaray,Alshabaabka Baardheere ku sugan ayaa la sheegaya inay la kala safteen kooxaha sar sare ee Alshabaab ee khilaafku ka dhexeeyo.
Dagaalkan ayaa la sheegay inay ku geeriyoodeen in ka badan 8 askari oo ka tirsan Alshabaab,waxaana la xaqiijinaya inuu dhaawacuna kor u dhaafay in ka badan 20 askari oo labada dhinac ah,waxaana dagaalkaasi maanta ka dhacay duleedka Magaalada Baardheere lagu kala qabsaday gaadiid dagaal.
Labada ciidan ee dagaalamay ayaa la sheegayaa inay la kala safan yihiin Hogaanka Falaagada Alshabaab Axmed Cabdi Godane iyo Mukhtaar Roobow Abu Mansuur oo isagu shaaciyey inuu ka soo horjeedo fekeradda qaldan ee uu wado hogaanka Alshabaab,waxaana dagaalkaasi la sheegay inuu salka ku hayo muranka horjoogayaasha Alshabab ka dhex taagan.
Ciidamada dagaalamay ayaa la sheegayaa inay yihiin kuwii dhawaan ka soo cararay Magaalada Baraawe halkaasi oo uu hogaanka Alshabaab ku dilay dhawr nin oo fekerkiisa ka soo horjeeday kuwaasi oo diiday talaabooyinka uu waday Axmed Godane,waxana arrintaasi keentey inuu dhegta dhiiga u darro.
Ugu dambeyntii Ciidamada Alshabaab ayaa la sheegaya inay hadda ku isku horfadhiyaan duleedka Magaalada Baardheere isla markaasna isu hub aruursanayaan,waxaana laga cabsi qabaa in dagaalkaasi ku soo fido gudaha Magaalada Baardheere oo dad shacab ahi ku sugan yihiin,ma jiraan cid shabaabka ka tirsan oo dagaalkaasi ka hadashay,waxaana muuqata in calankii Alshabaab uu dhulka sii galayo dhibkii ay umadda ku hayeena uu iyagu dib ugu laabtay.
Isha Ku Hay Allgalgaduud
Allgalgaduud@gmail.com
