Beledxaawo(AGGM) Taliyaha Saldhiga Dhexe ee degmada luuq oo saaka saxafada la hadlayey ayaa si kulul u beeniyey hadalo dhawaan warbaahintu qortey isla markaasna ahaa inuu Diyaad Cabdi Kaliil tageerey Maamulkii dhawaan Axmed madoobe kaga dhawaaqay magaalada Kismaayo,waxaana uu Diyaad Cabdi Kaliil sheegey in lagu been abuurtey.
Diyaad Cabdi Kaliil oo Saaka shir jara’id ku qabtey gudaha degmada Luuq ayaa saxafada u sheegey inuusan tageersaneyn Axmed Madoobe iyo kooxdiisa isla markaasna uu tageersan yahay mawqifka dawlada federaalka ah ee soomaaliya ka qaadatey arrimaha kismaayo,waxaana uu sheegey in warkii dhawaan saxafada lagu qorey ahaa mid been abuur ah.
Sidoo kale waxaa uu eedeyn kulul u jeediyey warbaahinta soomaaliyeed ee arrintaasi baahiyey,waxaana uu sheegey inay ku been abuurteen isla markaasna uusan jirin cid uu tageerey oo dhaafsan dawlada soomaaliyeed,waxaana uu baaq u direy saxafada soomaaliyeed isagoo ugu baaqey inaysan madaxda soomaaliyeed ku been abuuran.
Waxaa uu Diyaad Yiri ” Anigu maan tageerin Axmed Madoobe iyo maamulladda kismaayo, mana dhaceyso dawlad soomaaliyeed oo dalka ka jirta inaan tageero koox danno gaar ah leh, waxaana kula talinayaa inay ka digtoonaadaan seef la boodnimadda una hogaansamaan dawladooda’.
Dhinaca kale waxaa uu baaq u direy maamuladda iskood isu magacaabay ee looga dhawaaqay magaalada kismaayo,waxaana uu ugu baaqey inay dawladooda tageeraan isla markaasna u hogaansamaan rabitaanka shacabka soomaaliyeed isagoo xusay in dawlada soomaaliya shacabka soomaaliyeed iyo dhulka soomaaliyeed iyadu masuuliyadeeda qaaday.
Ugu dambeyntii waxaa hadalkani imaanayaa xilli dhawaan saxafada soomaalidu qortey inuu Diyaad Cabdi Kaliil uu tageerey ismagacaabistii Axmed madoobe ee kismaayo,waxaana uu hadda saxafada u shaaciyey in lagu been abuurtey isla markaasna ay jiraan kooxo ku qaraabta saxafada soomaalida isla markaasna beenta faafiya.
Salebaan Daahir Faarax
Beledxaawo,Gedo
Isha Ku Hay Allgalgaduud
Allgalgaduud@gmail.com
