Waxaa sii fidaya banaanbaxyo loogaga soo horjeedo sida ay Booliska Maraykanka ula dhaqmaan dadka madowga ah gudaha dalka Marayanka iyo wadamo kale oo caalamka ka mid ah.
Dadka banaanbaxaya ayaa iska dhega tiray bandow ay dowlada Maraykanka soo rogtay,sidoo kale waxaa banaanbaxyo kale ay ka dhaceen dalka Britiain.
“Ma Neefsan karo” oo ah ereyadii ugu dambeeyay ee uu ku hadaaqayay George Floyd ayay ku qeylinayeen dadka banaanbaxaya iyagoo qaarkoodna watay boorar ay ku qornaayeen ereyo ka tarjumaya in nolosha qofka madow ay muhiim tahay.
Banaanbaxyadan ayaa waxaa ay banaanka u soo saareen dareen ay dadku ka qabeen dilalka ay ciidamada Booliska gacantooda ugu geystaan dadka madow ee rayidka ah.
Sidoo kale kumanaan ruux ayaa isugu soo baxay magaalada London ee dalka Ingiriiska iyagoo banaanbax ka dhigey safaarada Maraykanka ee magaalada London.
Magaalooyinka Cardiff iyo Manchester ayaa sidoo kale laga soo weriyay banaanbaxyo loogaga soo horjeedo sida ay ciidamada Booliska Maraykanka ula dhaqmaan dadka madow.
