Ciidamada Xoogga dalka Soomaaliyeed ee fariisinkooda yahay Degmada Baardheere ee Gobolka Gedo ayaa wada howlgal ballaaran oo ay Al-Shabaab kaga saarayaan deegaanno dhaca Galbeedka Degmada Baardheere oo maalmahii la soo dhaafey ay soo buux dhaafiyeen Xubno ka tirsan Al-Shabaab.
Saraakiisha howlgalka hoggaamineysa ayaa waxaa ay sheegeen in cabasho uga timid dadka Shacabka ah ee ku nool tuulooyin hoostaga Baardheere gaar ahaan Tuulooyinka Reydab iyo daar Macalin oo ay sheegeen inay dhibaato kala kulmeen Ururka Al-Shabaab.
Abaanduulaha Ururka 49aad Guutada 1-aad qeybta 43aad Xidigle Maxamed Weli Cabdullaahi Xersi ayaa sheegay in deegannada ay howlgalka ka fuliyeen ay 40km dhinaca Galbeed ka xigaan degmada Baardheere,isla markaan ay dhibaatooyin ka wadaan Al-Shabaab kana qaadanayeen xoolahooda sida uu hadalka u dhigay.
Waxaa uu sheegay in Ciidamada Dowladda ay la wareegeen Saldhigyadii Al-Shabaab ku lahaayeen deegaannada Reydab iyo daar Macalin,isla markaana ay guul ka gaareen dagaal ay la galeen.
