Kulanka guud ee Xildhibaanadda Golaha Shacabka ee BJFS oo looga dooday Ajendayaal dhowr ah

0

Kulanka guud ee Xildhibaanadda Golaha Shacabka ee BJFS oo uu shir guddoominayay Guddoomiyaha golaha Shacabka, Mudane Maxamed Mursal Sheekh Cabdiraxmaan, ayaa ugu horeyn waxaa warbixin looga dhageystay guddigii xaqiiqa raadinta ahaa ee loo diray shaqaaqooyinkii Bishii hore ka dhacay Magaalooyinka Dhuusamareeb iyo Gaalkacyo,waxaana warbixintaas golaha u akhriyay Xildhibaan Maxamed Aadan Macalin ‘’Maxamed Soomali oo ka mid ah gudigaas.

Sidoo kale Guddoomiyaha guddiga Maaliyadda,Miisaaniyadda,qorsheynta iyo la xisaabtanka hay’adaha Dowladda ee Golaha Shacabka Xildhibaan , Maxamed Cabdullaahi Siraaji ayaa golaha uga warbixiyay Akhrinta Saddexaad Xisaab xirka Dowladda ee Sanadkii 2017.

Dhinaca kale, Xildhibaanadda Golaha Shacabka ayaa Akhrinta Labaad marsiiyay hindise sharciyeedka hay’adda duulista Rayidka  Soomaaliyeed,waxaana golaha u akhrisay ,Xildhibaan Farxiya Muumin Cali ,oo ah Xoghayaha Guddiga howlaha guud ee Golaha Shacabka.

Qaar ka mid ah Xildhibaanadda golaha Shacabka oo hindise sharciyeedkan fikirkooda ka dhiibtay, wuxuuna Guddoomiyaha golaha Shacabka oo kulanka soo xiray sheegay in warbixintii ay keeneen Gudigii xaqiiqa raadinta uu goluhu qaraar kasoo saari doono.