Sacuudiga Oo War Cusub Kasoo Saaray Dilkii Jamaal Khashoggi

0

Dowladda Sacuudiga ayaa sheegtay inaysan aqoonin goobta lagu aasay maydka Suxufigii Jamaal Khashoggi, kaasi oo ay koox ka tirsan Sirdoonka Sacuudiga dileen, jarjareen, kadibna maydka ku shubay Aashito bishii October 2-dii ee sannadkii hore.

Wasiiru-dowlaha Arrimaha Dibedda ee Sacuudiga, Caadil Al-jubeyr ayaa hadalkaasi ku sheegay Wareysi uu  siiyey  Barnaamijka “face the Nation” ee Telefishinka CBS ee dalka Maraykanka.

Waxa uu sheegay inay Saraakiil Sacuudiyaan ah qaadeen dilkaasi oo uu ku tilmaamay fal ka baxsan Awooda 11-kii qof ee dilkaasi fulisay, kuwaasi oo lagu soo oogay Dembigaasi.

Mar wax laga weydiiyey halka uu ku dambeeyey maydkii Jamaal Khashoggi, waxa uu Wasiiru-dowlaha Arrimaha Dibadda ee Sacuudiga, Caadil Al-jubeyr ku jawaabay: “Ma garanayno”.

Waxa uu sii raaciyey inuu Dacwad-oogaha Dowladda mas’uul ka yahay  Kiiskaasi, oo u baahan caddaymo ka yimaada Dowladda Turkiga, balse aysan weli ka soo jawaabin codsigaasi.

Waxaa kaloo la weydiiyey Caadil Al-jubeyr sababta ay Eedeysanayaasha ugu sheegi waayeen Baarayaasha halka ay dhigeen maydka Jamaal Khashoggi, wuxuuna ku jawaabay: “Waxaan weli ku jirnaa Baaritaanka, waxaan haatan haynaa tiro suurtogal ah, waxaana weydiinaynaa iyaga halkii ay dhigeen maydka”

Waxa uu sii raaciyey  inuu u malaynayo in baaritaanka weli socdo iyo inuu rajeynayo in xaqiiqda la heli doono.

Dhinaca kale, waxaa wax laga weydiiyey inuu Dhaxal-sugaha Sacuudiga, Amiir Maxamed Bin Salmaan ka mas’uul yahay amarka lagu dilay Saxafigii Jamaal Khashoggi, waxa uu Caadil Al-jubeyri carrabka ku adkeeyey inuusan Amiirku bixinin Amarkaasi.

Wargeyska The News Times waxa uu Jimcihii la soo dhaafay qoray inay Hay’adda Sirdoonka CIA-da  duubeen codka Amiirka Sacuudiga oo u sheegayey Gacan-yare sare sannadkii 2017-kii in uu Xabbad la daba kici doono Jamaal Khashoggi, haddii uusan ku soo laabanin dalka Sacuudiga.

Xogtaasi Sirdoonka ayaa waxa uu Telefishinka CBS wax ka weydiiyey Wasiiru-dowlaha Arrimaha Dibedda ee Sacuudiga, Caadil Al-jubeyr, wuxuuna ku jawaabay: “Aniga ma doonayo inaan hadal ka dhiibto Warbixintaasi oo asaas looga dhigay Xogo aan la aqoonin”.

CIA-du waxay warbixinteeda ku soo gebagebeysay in Hawlgalkii Sacuudiga ee lagu dilay Saxafigii Khashoggi u muuqato inuu si toos ah u maamulayey Dhaxal-sugaha awoodda badan ee dalka Sacuudiga.

SHARE

LEAVE A REPLY

Please enter your comment!
Please enter your name here