WARQAD FURAN: Madaxweyne Farmaajo iyo R/wasaare Kheyre dadki waa ay wada cabanayaan.

1

Madaxda Soomaaliya, waa inay ogaadaan in dadka Soomaaliyeed ee sida hoose xog ogaalka u ahaa mid xil haya iyo mid shacab ahba waa ay wada cabanayaan.

Cabashadaan ayaa ah mid salka ku haysa, is riix riix, isbaheysiga iyo ku baratanka Madaxda dalka yaan lagaaga dhawaan, hebel gees hala geliyo iyo hebel gees hala geliyo, yaan hebel usoo dhawaan Madaxda iyo xafiisyadooda, haddii uu hebel madaxda usoo dhawaado anagaa meesha ka baxayna iwm, arrintaas waxa ay u keenaysaa madaxda dalkeena ceeb iyo eed aysan shaqsiyan iyagu gelin, shaqsiyaad ka ag dhawna ay galayaan, waxaana laga horkeenayaa dadkii Soomaaliyeed haddii ay yihiin mid xil haya iyo mid aan xil hayn oo shacab ahba, dhaqankan waxa uu dalkeena u horseedayaa horumar la’aan, is aamin la’aan iyo bur bur deg deg ah oo dhan walba ah.

Waxaan si xurmadi ku jirto ugu sheegayaa haddii ay og yihiin iyo haddii ay ogeynba Madaxda dalka, waa inay ka warhayaan guud ahaan dalka iyo dadka, gaar ahaana waa in ay isha ku hayaan habdhaqanka hawlwadeenada xafiisyadooda iyo dadka ku hareereysan, waana inay si joogta ah ula socdaan cabashooyinka dhamaan qaybaha kala gedisan ee bulshada Soomaaliyeed, waana in aysan aqbalin in shan nin ama koox yar inta ay isku geedaamaan go’adoona ka geliyaan Madaxda kale iyo Shacabka Soomaaliyeed.

Waxaa xaqiiqo ah haddii ay sidaa wax kusii socdaan ama ay sii joogaan dadka fikirka noocaas ah ku dhaqma xafiisyada iyo hareeraha Madaxda dalka oo ay dadka Soomaaliyeed maalinba mid xil haya iyo mid aan xil haynba kala koox kooxeeyaan ama eryadaan, Madaxdeena waa inay ogaadaan in cidlo ay kusoo dhacayaan islamarkaana aan marnaba ay Soomaaliya heleyn Qaran xoog iyo sharaf leh, waxa lagu taageerayana ay noqon doonaan hal bacaad lagu lisay.

Gabgabo waxaan ugu baaqayaa Qof walba oo Soomaali ah oo samo jecel ah, mid xil haya iyo mid aan xil heynba, waxaa mas’uuliyad naga wada saaran tahay dalkan iyo dadkiisa, waana in si wadajir ah loola diriro dadka ku dhaqma dhaqankaan xun ee ragaadiyay dalkeena, ceebta iyo eeda fogna gelinaya Madaxda dalka iyagoon waxba ka ogeyn, waa inaan u istaagno difaaca nuurka yar iyo rajada weyn ee maanta u ifaya ama u muuqata Soomaali oo dhan oo aan si walba ku difaacano nuurkaas iyo rajadaas weyn, waxaa kaloo aad iyo aad muhiim u ah in aan dib u raacno taariikhdii shalay ahayd ee dalkeena oo aan wax ka barano, Taariikhdaas iyo halka uu dalkeena dhigay dhaqanka noocan oo kale ah. Dalka iyo Dadka, Nabad iyo Nolol, Soomaaliya Ha Noolaato.

W/Q: Nur Ugas
Email. nurugas@gmail.com

SHARE

1 COMMENT

  1. Asc Nur Dadka cabanaya waayo? bal dib u eeg Farmaajo iyo Kheyre qofkii doonaya wuu arki karaa oo xalaal ah wanaagna la raba dalkaan iyo dadkiisa aadka u soo daalay laakiin Dad waxa ay rabaan ay tahay in dalkaan uusan horey u socon oo lagu jiro iska daba wareeg iyo mooryaannimo kuwaas dan uma hayaan dalka iyo dadka Farmaajo iyo Kheyre waaba lagu cadaabayaa hadii ay kuwaa dhegeystaan waana wixii loo doortay iney dadka iyo dalka ka qabtaan kuwaa oo kale, tan kale dadka yar ee ku gadaaman oo aad ka hadleyso wzxaan u fahmay agaasimaha madaxtooyada Fahad Yaasiin, dadka uu ku dhacay xanuunka Fahad Yaasiin ma Farmaajo iyo Kheyre ayaa dembi ku leh ilaah ayaa daweyn kara xanuunkaas aadna ugu fiirso dadka ninkaa ku xanuunsaday waa 2 qolo oo kala ah qolo ku colaadineysa in doorashadii Farmaajo uu isaga sabab u ahaa oo ay iyagu ku guuleysan lahaayeen hadii Fahad Yaasiin uusan Farmaajo raacin, iyo qolo kale oo imaaraadka gacan saar la leh oo leh Fahad Yaasiin Qatar ayuu u shaqeeyaa oo dhinac ka ah dagaalka imaaraadku kula jiro Farmaajo iyo Kheyre ka dib markii ay ka diideen in Qatar u colaadiyaan imaaraad baa la dagaalay maadaama ay yihiin rag hogaaminaya dal iyo dad xor ah oo aysan madiidin u noqon karin danno dawlado kale leeyihiin waana sida qof kasta oo caqli caafimaad qaba u fikiri lahaa maxaa naga galay oo aan ugu kula hiilinaa oo dhexdooda na gelinaya dawlado dhergay oo carab ah oo kibirkii isku diray inay Kheyre iyo Farmaajo ku saxsanaayeen mawqifkaasna waxaa narqaati ka noqday Urdun oo dhib ka dhaxlay taageeradii xulafada sacuudiga sidoo kale Sudan iyo xitaa Jabuuti oo wax ay ka faa’iideen aan la hayn ilaa iyo maanta oo aan ka ahayn karaamo darro marka dadka iyo dalka Soomaliyeed ayaa ka weyn kana mudan in 2daa qolo warkooda la dhageysto ilaahayna ha ka qabto madaxda 2daa dulli waxa soo weheliya waa nimanka maamul goboleedyada oo xaalkooda laga wada dhereg sanyahay kuwaana ayagaa idaacadaha ka qeyliya wey ogyihiin inuu u furanyahay albaabka Farmaajo iyo Kheyre laakiin ayagaa ka dhex arkay dantooda inay idaacadaha ka qeyliyaan iyagoo awr ku kacsi iyo boor isku qarin wada laakiin weligaa ma aragtay Farmaajo iyo Kheyre oo hadal xun ama wax ka sheegaya nimankaa madaxda maamulada ah maya garta ilaahay bay taqaan.marka cabaadka beenta iyo munaafaqada wata waa farsamooyin laga dhaxlay burburkii oo dad ay u barteen inay ku caana maalaan laakiin wax walba billoow iyo dhamaax ayey leeyihiin.

LEAVE A REPLY

Please enter your comment!
Please enter your name here