MAANSO: Maansadan waxaan curshay ka dib markii aan helay warka ah in xukuumaddii la ansixiyey oo Baalamaanku kalsoonida siiyey. Midda aan dul istaagay ee maansada curinteeda igu dhalshay ayaa ahaa, in la yiri “COD AQLABIYAD AH” ayaa lagu meelmarshay. Yaab. Sida aan horay u barannay caadana iska noqotay sanad ama ka yarba waxaa laga geyn doonaa Mooshin ka dhan, markaa baa waxaan iri:
Carrab hadal madaayoo
Waano lama cusleystee
Casirkaan waraan helay
Oo caadku uu wadey
Aan ka curiyo maansoo
Suugaanta caynleey
Cutub gabay ka tiriyoo
Cir mareen u sii faro
Inta joogta ceelkii
Cawo maalinteed lehe.
Waa loo codeeyoo
La caleema saaroo
Loo dhaarshay carshigii
Cosob weeye cusub iyo
Caabbane cargaagtamay
Cillad kuma dhammaatee
Caqli kale ma heysaan?.
Cidda yaan la hodinoo
Cirid iyo cadceed kulul
Cagaag cagaha muda iyo
Ciirsi waagi baas iyo
Ha u celinnin tiihii!
Adigoon caqiidada
Caynkeeda soo baran
Masjid culimmo joogaan
Cunsur laguma sheegee
Caallayaasha joogee
Carbis aan la soo marin
Caqli samata bixiyiyo
Maan curiya nabaddiyo
Garaad ceyminaayiyo
Celmi caafimaad iyo
Mey lahan cisiyo sharaf!
Cirroolihiyo waayeel
Carruurtiyo haweenkiyo
Marrastiyo ciyaalkiyo
Kulli caam ahaanteen
Ciriirigaan ku sugan nahay
Iyo calaalcalkeennii
Cidi aysan caawimin
Ma hayaan caaqibadood?!
Dadku wuxuu cod hoosiyo
Uu ci’ dheerba ku cabbiray
Inaad camal abuurtaan
Ood cayaarta dhaaftaan
Carro nabada keentaan
Cudurkiyo caqabaddiyo
Caabuqana dhammeysaan
Calafka iyo cududdiyo
Ciidankana mideysaan
Calankana difaacdaan
Cadawgana ka celisaan
Caadi maahan saaniye
Waa cajaa’ib yaabliyo
Waxaan noo cuntaminoo
Ceeb nagu ahaayoo
Caajis nagu diloodoo
Na cuuryaanshey waayee
Noo iclaansha talo culan.
Cadka leysku heystoow
Ama waan ku cunayaa
Ama waan ku ciideyn
Cimrigeenni gooyoo
Cabashaan ka keennaye
Wax cillani dushiinniyo
Cindigiinna yey noqon!
Dhammaad.
21/01/14
Bashiir M. Xersi
brdiraac@hotmail.com
www.bilediraac.wordpress.com
Isha Ku Hay Allgalgaduud Media
allgalgaduud@gmail.com
