GABAY: Gabaygan Dib u heshiin qaata waxa curiyey Maxamed Cilmi Dhicisow, iyada oo ay suugaantu ku wanaagsantahey in loo adeegsado waddaniyadda, wadajirka iyo walaalaynta, iyo hiddaha iyo dhaqanka suubban ayuu gabaygani waxa uu taabanayaa dib u heshiinta iyo dabargoynta dagaallada. Akhris wanaagsan.
Hadday dani ku jirin hadalka, waa layska daayaaye
Deexdeexsigiyo laguma daro, eray dinnaaheede
Nin oraah ku duullaamey, wuu daraja tirayaaye
Dillaan raaca qaarkiina waa, lagu dambaabaaye
Tix daliil leh, murti dabacsanoo, maanka deeqaysa
Anigoon digtana badin dawgiisana, ka duulaayo
Dabuubtayda gabay maanta, waa dib u heshiisiine.
Da’daan jiriyo dayrtaan dhashiyo, duni intaan joogey
Dabayl caafimaad iyo ma arag, daawo nabadeede
Dugsi iyo duggaal iyo ma arag, daar waxbarasheede
Maamul daacadoo lagu degiyo, dowlad maan arage
Daljir iyo difaac iyo ma arag, gaardi daakhiliye
Isku duubni guud iyo ma arag, wadajir daadahane
Soomaaloo is doontoo midoo, diirran maan arage.
Kala daadsanaan iyo dil baa, loogu dawgalaye
Sidii doqon la kala jaadey baa, laysku dirayaaye
Shisheeyuhu intow daangadaa, layska daawaniye
Sidii doobbi iyo dayday baa, laysu dacareeye
I daay aan ku daayee uun baa, laysku dagayaaye
Dinnaahayntu waa waxa ka darey, oo ka sii daraye
Nin damiirki laga daabacdaa, daaimad malahe
Dallaal iyo mallaal bay noqdeen, diracyadeenniiye.
Xaajadaan la daahirin marnaba, laguma diirsado’e
Maashii la dado waa dambay, dib u dikaantaaye
Laba dirac hadday kala dambayn, ways dagaalaane
Caqligaan dawgiis garan marbow, dambas ka liitaaye
Indha-saabku waa dabar go’ aan laga dabiiboone.
Hayeeshee dadkoo wada jiroo, dib u walaaloobo
Mar in aan dul joogsado wallee, wad damiir qabaye
Balse waagey degi waay-dayeey, dib u qaraaraatey
Daa’iro ku joog iyo mar baad, doolal noqotaaye
Keenyaan in aan daba kacaan, dirir ka door bidaye.
Soomaalaay oraah dabacsan baan, idin dareensiine
Walaalkaa in aad daysataa, kaaga deli roone
Dooddana in aad qaataa, kaaga dawa roone
Diidmada in aad joojisaa, kaaga dana roone
Danahiinna eegtoo warhoy, dib u heshiin qaata.
Dukun daakun yay noqoninee, dib u heshiin qaata
Magaceennu yow duugminee, dib u heshiin qaata
Dadku yayna doorsoominee, dib u heshiin qaata
Daba-qabadku waa roonyahee, dib u heshiin qaata.
Isdaryeela oo duul noqdoo, dib u heshiin qaata
Deriskiyo xigaalaha dersoo, dib u heshiin qaata
Dirirtiyo dagaalada nacoo, dib u heshiin qaata
Dalka yaan shisheeyuhu degine, dib u heshiin qaata.
Danaheenna aan gaarno ee, dib u heshiin qaata
Dahab baa inoo baxahayee, dib u heshiin qaata
Dalag baa inoo beermayee, dib u heshiin qaata
Oo aan cadaawaha dilnee, dib u heshiin qaata.
Diintaa dastuur noqoniyee, dib u heshiin qaata
Daain baa inoo turahayee, dib u heshiin qaata
Dawadeenna aan duurxulnee, dib u heshiin qaata
Midnimada ku dayrsada misana, dib u heshiin qaata.
W/C. Mohamed Elmi Dhi’isow
elmi_0@hotmail.com
Isha Ku Hay Allgalgaduud Media
allgalgaduud@gmail.com
