Waxaa barqanimadii maanta si weyn magaalada Gaalkacyo ee xarunta gobolka Mudug loogu soo dhaweeyay musharaxa Prof. C/wali Maxamed Cali Gaas oo ka soo duulay magaalada Nairobi ee caasimadda dalka kenya.
Soo dhaweynta iyo isu-soo baxa musharaxa oo illaa shalay loo diyaar garoobayay waxaa ka qayb galayay qaybaha kala duwan ee bulshada, kuwaasi oo aan u kala harin soo dhaweyntiisa, waxaana magaalada illaa garoonka safnaa gaadiid ay ku dhagan yihiin sawirka C/weli Gaas iyo dadka oo lulayay calanka Puntland iyo kan Soomaaliya.
Prof. C/weli Maxamed Cali Gaas, ayaa sheegay inuu ka qayb galayo is-badalka iyo hannaanka siyaasadeed ee Puntland.
Musharaxa ayaa hadal kooban oo uu yiri waxaa uu ugu mahad celiyay dadkii soo dhaweeyay, isagoo sheegay inuu dib ka faahfaahin doono socdaalkiisa uu ku yimid Waqooyiga Gaalkacyo ee dhanka maamulka Puntland.
Gaas ayaa ka mid ah musharaxiinta ugu cadcad ee ka qayb galaya doorashada qabsoomi doonta 8-da bisha Janaayo ee sanadka nagu soo aadan, taasi oo lagu wado in ay ka dhacdo dhamaan deegannada uu maamulka Puntland ka arrimiyo.
