Dhoobleey (AGGM): Falaagada argagixisada ah ee Al Shabaab ee dagaalada kula jira Ciidamada AMISOM iyo dowlada federaalka Soomaaliya ayaa guul ka sheegtay dagaal ay sheegeen in maleeshiyadooda ay deegaan lagu Magacaabo Darbiyow oo u dhaxeeya Taabto iyo Dhoobley ee gobolka Jubada Hoose kula galeen ciidamada Sierra Leone ee qeybta ka ah howlgalka AMISOM, kaa oo ay sheegeen in ay ciidamo kaga dileen kuwa Sierra Leone.
Cabdi Casiis Abuu Muscab Afhayeenka Dhinaca howlgalada falaagada Al Shabaab ayaa sheegay in dagaal ciidamadoodu ay kula galeen ciidamada Sierra Leone inta u dhaxeysa Dhoobley iyo Taabto ay ku dileen 7-askari oo Sierra Leone ah labo gaari oo mid booyad ahna ay ku gubeen, sida uu hadalka u dhigay.
Dhinaca kale Axmed C/llaahi oo ah horjoogaha maleeshiyo beeleedka Raaskambooni ee degmada Dhoobley ayaa waxba kama jiraan ku tilmaamay sheegashada falaagada Al Shabaab ee ah in dagaalka ay ku dileen 7-kamid ah ciidamada Sierra Leone ee qeybta ka ah howlgalka AMISOM, isagoona xusay in hadiiba ay jiri laheyd khasaarahaasi aysan dafireen, balse imika aysan waxba ka jirin.
Marka laga soo tago sheegashada labada dhinac ma jirto cid ka madax banaan oo xaqiijinaya ama beeninaya sheegashadooda, ayadoona inta badan dagaalada ka dhaca gobolada dalka ay guulo ka kala sheegtaan dhinacyada ku dagaalama.
Isha Ku Hay Allgalgaduud Media
allgalgaduud@gmail.com
